ब्राजिलयन मेकअप आर्टिस्ट प्रिस्किला (बीचमा)
चैत १२ काठमाडौं।
विश्वचर्चित फुटबल खेलाडी नेयमारकी ब्राजिलियन मेकअप आर्टिस्ट प्रिस्किला लेसाले नेपालमा सौन्दर्य कलासम्बन्धी मास्टरक्लास दिने भएकी छन् । उनले दिने कक्षा सोल्डआउट भइसकेको छ ।
काठमाडौं बसाइमा उनले भक्तपुरको गट्ठाघरमा खुल्ने नयाँ मेकअप स्टुडियोको उद्घाटन समेत गर्नेछिन् । यो उद्घाटनमा पूर्वमिस नेपाल प्रियंकारानी जोशी पनि सहभागी हुने जनाइएको छ ।
न्युयोर्कमा मिस नेपाल नर्थ अमेरिका आयोजना गर्दै आइरहेका शैलेन्द्र श्रेष्ठ लगायतको समूहले लेसालाई नेपालमा ल्याएको हो । ‘प्रिस्किला मेकअप वर्कशप’ नाम दिइएको यो कार्यशाला सोमबारदेखि सुरु भएको छ, जुन बुधबारसम्म चल्नेछ ।
अन्तर्राष्ट्रिय मेकअप आर्टिस्ट र शिक्षा अभियन्ता समेत रहेकी प्रिस्किलालाई इन्स्टाग्राममा १३ लाखले पछ्याएका छन् । यसअघि उनले मेक्सिको, कोलम्बिया, इक्वेडर, रुस, पाराग्वे, अमेरिका, रोमानिया, भारत, पेरु लगायतका मुलुकमा मेकअप वर्कशप सञ्चालन गरेको जनाइएको छ ।
