काठमाडौं १८ फगुन ।
सामाजिक संजालमार्फत बलिउड जोडी दीपिका पादुकोण र रणवीर सिंहले पहिलो सन्तानलाई स्वागत गर्न लागेको जानकारी दिएका छन् ।
दीपिकाले इन्स्टाग्राम पोस्टमा मिति उल्लेख गर्दै पोस्टको ग्राफिक्समा शिशुको लुगाफाटो चित्रण राखेको छिन्। गतसाता आयोजित बाफ्टा अवार्ड समारोहमा नै दीपिका गर्भवती रहेको चर्चा चलेको थियो। उनीहरुले राखेको पोष्टमा अनिल कपुर, मनिष मल्होत्रा, मेधा शंकर, अंगद बेदी, मियाङ चाङ, कुब्ब्रा सैत, मसाबा गुप्ता लगायतका कलाकारले कमेन्ट गरेर बधाई दिएका छन् ।
२ महिनाअघि मात्रै दीपिकाले सिंगापुर भोग म्यागजिनलाई दिएको अन्तर्वार्तामा चाँडै परिवार सुरु गर्ने इच्छा व्यक्त गरेकी थिइन्। दीपिका र रणवीरले सन् २०१८ मा विवाह गरेका थिए । दुवैको पहिलो भेट फिल्म ‘गोलियों की रासलीला ः रामलीला’ को सेटमा भएको थियो । सँगै काम गर्दागर्दै दुवै प्रेममा परे र ५ वर्षको सम्बन्धपछि दुवैले विवाह गरेका थिए ।
