काठमाडौं, १३ चैत्र २०७९
राष्ट्रियसभाको बैठकले ‘राष्ट्रिय मर्यादासम्बन्धी विधेयक, २०७९’ विधेयकलाई सर्वसम्मतिले स्वीकृत गरेको छ । गैरसरकारी विधेकयकको रूपमा आएको उक्त विधेयकमाथि बैठकमा सैद्धान्तिक छलफल भई सर्वसम्मतिले स्वीकृत गरेको हो ।
नयाँ मर्यादाक्रमले नेपाल सरकारका शाखा अधिकृतलाई वडा अध्यक्ष भन्दा पनि तल लगेर राखेको छ । जनप्रतिनिधि र कर्मचारीबीचको मर्यादाक्रम मिलाउन नसक्दा मर्यादाक्रममा सदैव लफडा देखिदै आएको छ । सरकारले कर्मचारीहरु भन्दा जनप्रतिनिधिलाई माथि राखेर निर्धारण गरेको मर्यादाक्रमप्रति कर्मचारीहरुले आपत्ति प्रकट गर्न थालेका छन् ।
यस अघि सार्वजनिक भएको मयार्दाक्रममा संघीय सरकारका प्रतिनिधिसमेत रहेका प्रजिअलाई स्थानीय तहका जनप्रतिनिधिसरह राखेर अपमान गरिएको थियो,जुन पछि संशोधन भएको थियो । यस्तै वडा अध्यक्ष,नगर कार्यपालिकाको सदस्य,स्थानीय तहका पूर्व पदाधिकारीहरु त्यो भन्दा उपल्लो मर्यादाक्रममा राखिएको छ ।
मर्यादाक्रममा नेपाल सरकारका उपसचिव,गाउँपालिकाका उपाध्यक्ष,प्रमुख सेनानी,प्रहरी उपरीक्षकहरुलाई २० औं नम्बरको मर्यादाक्रममा राखिएको छ । यस्तै नेपाल सरकारका सहसचिवहरुलाई मर्यादाक्रमको १९ औं नम्बरमा राखिएको छ । यस पटक मर्यादाक्रमको सूचीबाट पूर्वराजालाई हटाइएको छ । भने प्रदेश प्रमुखहरूको मर्यादाक्रमलाई शुरुको जस्तै छैठौं कायम गरिएको छ ।
