चैत्र १९ काठमाडौँ ।
कतार र यूएईको जेलमा रहेका नेपाललीले आम माफी पाएका छन्। कतारको जेलमा कैद भएका १८ र यूएईमा रहेका १ सय ६६ जना नेपालीले आम माफी पाएका हुन्।
संयुक्त अरब इमिरेट्स (यूएई) ले इस्लाम धर्मावलम्बीको पवित्र महिना रमजानको अवसर पारेर कैद भुक्तान गरिरहेका नेपालीहरुलाई आममाफी दिएको छ।
त्यस्तै, कतारले पनि कैद भुक्तान गरिरहेका नेपालीहरुलाई आममाफी दिएको हो। यसरी आममाफी पाउनेहरुमा कतिपय जरिवाना तिर्न नसकेर कैद भुक्तान गरेका र तोकिएको कैद सजाय पूरा गर्ने अन्तिम चरणमा रहेकाहरू छन्।
आबुधाबीस्थित नेपाली दूतावासका अनुसार मदिरा सेवन, चोरी लगायतका विभिन्न मुद्दामा जेल सजाय भोगिरहेका नेपालीले आममाफी पाएको र उनीहरुलाई जेलबाट ’डिपोर्टेसन सेन्टर’मा ल्याई नेपाल पठाउने तयारी भइरहेको दूतावासले जनाएको छ।
आज परराष्ट्र मन्त्रालयले एक विज्ञप्ति जारी गर्दै युएई सरकारको उक्त कदम हार्दिकतापूर्ण द्विपक्षीय सम्बन्धको नमुना भएको साथै आममाफी दिइएकोमा युएई सरकारप्रति नेपाल सरकारले कृतज्ञता ज्ञापन गरेको जनाएको छ।
परराष्ट्र मन्त्रालयका अनुसार अबुधाबीस्थित नेपाली दूतावासको अनुरोधमा युएई सरकारले उनीहरुलाई आममाफी दिएको जनाएको हो।
