चैत्र २ काठमाडौं ।
नेपाली महिला राष्ट्रिय क्रिकेट टोलीले युगान्डामा जारी खेलमा नेपालले हङकङलाई ६ विकेटले पराजित गरेको छ।
हङकङलाई पराजित गरे सँगै नेपाली महिला राष्ट्रिय क्रिकेट टोलीले युगान्डामा भइरहेको चारदेशीय प्रतियोगितामा दोस्रो विजय हात पारेको छ।
पहिलो ५ मध्ये ४ खेल हारेर फाइनल दौडबाट बाहिरिइसकेको नेपालले शुक्रबार डबल राउन्ड रोबिन लिगको अन्तिम खेलमा हङकङलाई ६ विकेटले पराजित गरेको हो।
फेरि नेपालले हङकङसँगै तेस्रो स्थानको प्लेअफका लागि आइतबार खेल्ने भएको छ। हङकङले इन्टाबेमा टस जितेर ब्याटिङ गर्दै निर्धारित २० ओभरमा ८ विकेट गुमाई १ सय ४ रन बनायो।
हङकङले ६ खेलमा ३ मात्र जिते पनि फाइनल दौडबाट बाहिरिएको थियो। अफ्रिकी टोलीद्वय युगान्डा र नामिबिया आइतबार फाइनलमा प्रतिस्पर्धा गर्नेछन्। आयोजक युगान्डाले ६ मध्ये ४ र नामिबियाले ३ खेल जितेका थिए।
नेपाललाई पराजित गरेको भए हङकङ फाइनल पुग्ने थियो। तर, नेपालसँगको हारपछि हङकङ रनरेटमा नामिबियाभन्दा पछाडि रहेको छ।
