पुस २१ काठमाडौं ।
रास्वपा सभापति रवि लामिछाने विरुद्ध काठमाडौं प्रहरीले प्रमाण जुटाएको छ।
स्वर्णलक्ष्मी बहुउद्देश्यीय सहकारी संस्था लिमिटेडमा अनियमितता भएको १ अर्ब १९ करोडमध्ये ५ करोड ७८ लाख ९६ हजार रुपैयाँ गोर्खा मिडिया नेटवर्कमा को पठाएको भेटिएको छ।
पोखराको सूर्यदर्शन सहकारी ठगीमा संलग्न रहेको आरोपमा प्रहरीले रवि लामिछानेलाई २०८१ कात्तिक २ गते वनस्थलीस्थित रास्वपा मुख्यालय बाट पक्राउ गरेको थियो।
अहिले सूर्यदर्शन सहकारी प्रकरणमा जिल्ला अदालत, कास्कीमा थुनछेक बहस चलिरहेको छ। यही बेला लामिछाने जोडिएको अर्को सहकारी प्रकरणमा काठमाडौंमा मुद्दा दर्ता भएको हो।
सहकारीबाट प्रत्यक्ष रुपमा २ करोड ६६ लाख र विभिन्न व्यक्तिका नाममा फर्जी खाता खडा गरेर २ करोड १३ लाख ९६ हजार रुपैयाँ गरी ५ करोड ७८ लाख रुपैयाँ गोर्खा मिडिया नेटवर्कमा गएको खुलेको हो।
कालिमाटीस्थित स्वर्णलक्ष्मी सहकारीमा बचतकर्ताको रकम हिनामिना भएको भन्दै जाहेरी परेपछि प्रहरीले गरेको अनुसन्धानका आधारमा जिल्ला अदालत, काठमाडौंमा आइताबार अभियोग पत्र दायर भएको जिल्ला सरकारी वकिलको कार्यालय, काठमाडौंले जनाएको छ।
अभियोगपत्रमा गितेन्द्रबाबु (जिबी) राई नेतृत्वको आपराधिक समूहबाट हिनामिना भएको रकममध्ये ५ करोड ७८ लाख रुपैयाँ गोर्खा मिडिया नेटवर्कमा गएको उल्लेख छ।
जीबी राईसँग रवि लामिछानेसहितको समूह संगठित रुपमा सहकारीको रकम हिनामिना गरी ठगी गर्ने कार्यमा प्रत्यक्ष संलग्न देखिएको प्रहरी निष्कर्ष गरेको छ।