पुस २० काठमाडौं ।
देशभर एकै साथ जलपन्छी गणना गरिने भएको छ।
आज देखि देशभरका ताल, तलैया नदी र सिमसार क्षेत्रमा एकै साथ जलपन्छी गणनाकार्य गरिने भएको हो। हरेक वर्षको जनवरी महिनाको पहिलो शनिवार देखि जलपंछी गणनाकार्य गरिँदै आएको छ।
नेपाल पंछीविद सङ्घका बरिष्ठ चरा विद तथा वेटल्याण्ड्स इन्टरनेशनल नेपालका लागि जलपंछी गणना संयोजक लक्ष्मणप्रसाद पौडयालका अनुसार जनवरी ४ तारिखदेखि १९ सम्म पुस २० गतेदेखि माघ ६ गतेसम्म जलपंछीको सङ्ख्या, प्रजाती, बासस्थानको अवस्था बारे जानकारी लिनका लागि गणनाकार्य हुन लागेको बताएका छन्।
स्थानीयरुपमा जलपंछी गणनाकार्य गर्नका लागि स्वयंसेवकको रुपमा देशभर २४ जनालाई साईट–कोअर्डिनेटरका रुपमा खटाइएको छ।
उत्तरी धुव्र रुस, चिन, मङ्गोलिया लगायत ठाँउमा अत्यधिक चिसो हुने क्षेत्रबाट हजारौंको सङ्ख्यामा चरा जाडो छल्न अनुकूल वातावरण र प्रचुर मात्रामा खानेकुराको खोजीमा नेपालका विभिन्न ताल, तलैया, नदी र वनजङगल क्षेत्रमा आउने गर्दछन्।
उत्तरी ध्रुवमा हिउँ परेर तापक्रम निकै चिसो हुने भएकाले चरा बाँच्नका लागि अनुकूल तापक्रमको खोजिमा नेपालमा आउने गर्दछन्।
यस अवधिमा पानीमा आश्रित तथा पानी वरिपरि बस्ने आवासीय र बसाइँसराइ गर्ने चराको तथ्याङ्क सङकलनकार्य हुने गरेको छ।
गत वर्ष कोशिटप्पु बन्यजन्तु आरक्ष, चितवन, बाँके, रारा राष्ट्रिय निकुञ्ज, बर्दिया, शुक्लाफाँटा, काठमाडौँ, पोखरा, लुम्बिनी, बिसहजारी ताल, घोडाघोडी, जगदिशपुर लगायतका तालसँगै देशका विभिन्न ताल तलैया र सिमसार क्षेत्रमा जलपंछी गणनाकार्य गरिएको थियो।
विगतका वर्षझै यस वर्ष पनि तराई, भित्रि मधेश, रारा ताल, काठमाडौँ उपत्यका र पोखरा उपत्यका सबै प्रमुख सिमसार क्षेत्रमा जलपंछी गणनाकार्य गरिने नेपाल पंछीविद सङ्घले जनाएको छ।
