चैत २१ काठमाडौं ।
विश्व फुटबलको सर्वोच्च निकाय नेपालको फिफा वरियता यथावत रहेको छ। आज सार्वजनिक गरेको फिफा वरियतामा नेपाल पुरुष फुटबल टिम १७५औं स्थानमै यथावत रहेको हो।
दक्षिण एसियामा भारत र माल्दिभ्सपछि नेपाल तेस्रो स्थानमा छ। भारत १२७औं र माल्दिभ्स १६४औं स्थानमा झरेको छ । भारत एक र माल्दिभ्स दुई स्थान तल झरेको हो।
नेपालले मार्चमा दुई अन्तर्राष्ट्रिय खेल खेलेको थियो। जहाँ मैत्रीपूर्ण खेलमा १४ स्थान माथि रहेको सिंगापुरलाई १–० ले पराजित गरेको नेपाल एसियन कप छनोटमा भने ४३ स्थान माथि रहेको मलेसियासँग २–० ले पराजित भएको थियो।
विश्व च्याम्पियन अर्जेन्टिना फिफा वरियताको शीर्ष स्थानमै यथावत छ। यस्तै स्पेन दोस्रो स्थानमा उक्लँदा फ्रान्स तेस्रोमा झरेको छ भने इंग्ल्याण्ड चौथो र ब्राजिल पाँचौ स्थानमा यथावत छन्।
