पुस ६ काठमाडौं ।
कर्णाली नदीको तल्लो तटीय क्षेत्रमा आगन्तुक लक्ष्मण सारस चरा आइपुगेका छन्।
नेपाल पंछी संरक्षण सङ्घ (वीसीएन)का चरा विज्ञ हिरुलाल डगौराको अनुसार चार वर्षदेखि निरन्तर रुपमा लक्ष्मण सारस प्रजातिको चरा कर्णाली नदीको तटीय क्षेत्रमा देखापर्दै आएको बताएका छन्।
कैलालीको टीकापुर नगरपालिकाको श्रीलङ्का टापुस्थित नदीको तटीय क्षेत्रमा लक्ष्मण सारस आज देखापरेका छ। सन् २००६ मा पहिलो पटक यो प्रजातिको सारस भजनीको मन्त्रीफाँटामा देखापरेपछि अभिलेखीकरण गरिएको थियो।
त्यसको १८ वर्षपछि मात्रै यो प्रजातिको सारस देखापरेको थियो। नेपालमा पाइने चार प्रजातिका सारसमध्ये लक्ष्मण सारस आगन्तुक प्रजाति रहेको छ।
साइवेरिया लगायत उत्तरी धु्रवमा चिसो बढेसँगै नेपाल, भारत, पाकिस्तान लगायत गर्मी हुने तराई क्षेत्रमा बसाइँ सर्ने यो पंछी नेपालका महाकाली, कर्णाली, कोशी, नारायणी, राप्ती लगायत नदी तटीय क्षेत्रमा देख्न सकिन्छ।
यसको शरीरको तौल औसत चारदेखि पाँच किलोग्रामसम्म र शरीरमा रहेका प्वांख खरानी रङको हुन्छ। यस्तै, टाउकोमा कालो, रातो र आँखाको पछाडि बाट माथिल्लो भागसम्म फैलिएको सेतो धर्कासहित कालो रङको हुन्छ।
यस चराले साइवेरिया लगायत ठाउँका ताल तलैया, सीमसार क्षेत्रमा प्रजनन गरी बच्चा कोर्लने गरेको चराविज्ञहरूको भनाइ छ।
उत्तरी ध्रुवमा हिमपात भएपछि अनुकूल मौसम, सुरक्षित बासस्थान र चरनको खोजीमा यो प्रजातिको सारस बर्सेनि नेपाल हुँदै भारत र श्रीलङ्कातर्फ जाने गरेको चराविज्ञ डङ्गौराले बताएका छन्।
