चैत १० काठमाडौं ।
‘मिलेनियम च्यालेन्ज कर्पोरेसन’ एमसीसीले निश्चित काम बढाउन अमेरिकी सरकारले अनुमति दिएको छ। नेपालमा सञ्चालन भइरहेको परियोजनाका निश्चित काम गर्न अनुमति दिएपछि एमसीए नेपालले खरिद सूचना निकाल्न थालेको हो।
अमेरिकी सरकारले विदेश सहयोगको समीक्षा गरिरहेको अवस्थामा एमसीसीको नेपाल कम्प्याक्ट अन्तर्गतका केही काम पुनः सुरु गर्न अनुमति दिएको छ।
काम अगाडि बढाउन अनुुमति दिइएका कार्यहरुमा महत्वपूर्ण खरिद कार्यहरु र कार्यालय सञ्चालन सम्बन्धी आवश्यक कार्यहरु रहेको एमसीए नेपालले जारी गरेको सूचनामा जनाएको छ।
एमसीए–नेपाल अमेरिकी सरकारको वैदेशिक सहायता सम्बन्धी समीक्षाबारे अद्यावधिक विवरणको प्रतीक्षा गरिरहेको जनाएको छ।
यसबीच आफूबाट पालना हुनुपर्ने कामहरू भएको सुनिश्चित गर्न नेपाल सरकार र एमसीसीसँग समन्वय गरिरहेको पनि जनाएको छ। अमेरिकी सरकारको अनुमति प्राप्त भएपछि यी बोलपत्र आह्वान भएको जानकार स्रोतले जनाएको छ।
तीनवटा सबस्टेसन तथा १८ किलोमिटर प्रसारण लाइनको ठेक्का लागेर भौतिक निर्माण समेत सुरु भइसकेको अवस्थामा फागुन सुरुमा एमसीसीले नेपाललाई दिने अनुदान तीन महिनाका लागि स्थगन गरेको थियो।
एमसीसी परियोजना अन्तर्गत ३ सय १५ किलोमिटर लामो ४०० केभी प्रसारण लाइन, ४०० केभीकै तीन सबस्टेसन र केही सडक सुधारका कार्यक्रम सञ्चालन हुँदैछन्।
