फागुन १६ काठमाडौं ।
चालु आर्थिक वर्षमा नेपाल विद्युत प्राधिकरणको नाफा ११ अर्ब ३६ करोडको नाफा कमाएको छ। चा.अ.व २०८१, ८२ को पहिलो ६ महिनामा नेपाल विद्युत प्राधिकरणले ११ अर्ब ३६ करोड रूपैयाँ नाफा कमाएको हो।
प्राधिकरणले यस अवधिमा विद्युत बिक्री, ब्याज तथा अन्य बाट कुल ७० अर्ब ४४ करोड रुपैयाँको आम्दानी गरेको जनाएको छ। सूचनाको हक सम्बन्धी ऐनको व्यवस्था बमोजिम सार्वजनिक गरिएको (स्वतः प्रकाशन) विवरण अनुसार उक्त आयास्रोत सार्वजानिक गरेको हो।
चालु आर्थिक वर्षको साउनदेखि पुस मसान्तसम्ममा प्राधिकरणको अप्रशोधित नाफा(करकट्टी गर्नु अघि) ११ अर्ब ३६ करोड रुपैयाँ हुने प्राधिकरणले जनाएको छ।
विद्युत खरिद, प्रशासनिक, विभिन्न आयोजनाहरू लगायतमा जम्मा ५९ अर्ब आठ करोड रूपैयाँ खर्च गरिएको जनाएको छ। आर्थिक वर्ष २०७२–७३ मा ८ अर्ब ८९ करोड वार्षिक घाटामा रहेको प्राधिकरण त्यसपछिका वर्षमा निरन्तर नाफामा रहेको छ।
खरिद गरिएको विद्युतका लागि ३४ अर्ब ८४ करोड रूपैयाँ रकम भुक्तानी भएको उल्लेख छ। भारतबाट २४ करोड २० लाख युनिट विद्युत आयात गरी एक अर्ब ६५ करोड रूपैयाँ भुक्तानी गरिएको छ। वैदेशिक सहायता सोझै भुक्तनीतर्फ १० अर्ब ४९ करोड रूपैयाँ खर्च भएको छ।
