चैत २० काठमाडौं ।
बागलुङको कालिका मन्दिरमा पर्यटकको संख्या बढेको छ। चैते दसैं सुरु भएसँगै कालिका मन्दिरमा धार्मिक पर्यटकको बढ्न थालेको हो।
चैते दसैंमा बागलुङ कालिका मन्दिरमा भने विशेष पूजाआराधना हुने भएकाले टाढा–टाढाबाट भक्तजन आउने गर्दछन्।
गण्डकी प्रदेशको मुख्य शक्तिपीठका रूपमा मन्दिरमा अहिल भक्तजनको भीड लागेको कालिका भगवती गुठी व्यवस्थापन समितिका अध्यक्ष कुमार खड्काले बताए।
‘चैते दसैंको तेस्रो दिनसम्म दैनिक हजारौंको सङ्ख्यामा भक्तजन आउने गर्छन् , यसपटक पाँच लाखभन्दा बढी भक्तजन आउने अनुमान गरिएको ’, खड्काले जनाएका छन्।,
‘यही अवसरमा चैत २० गतेदेखि यहाँ मेला आयोजना गरिएको छ, भक्तजनको चापलाई मध्यनजर गरेर सवारी पार्किङ, सुरक्षालगायतको व्यवस्था मिलाइएको छ।’
मेला आयोजनाका लागि ५५ लाख खर्चको अनुमान गरिएको छ। मन्दिरमा छिमेकी मुलुक भारत बाट समेत धार्मिक पर्यटक आउने गर्दछन्। मन्दिरमा शान्तिको प्रतीक परेवा उडाउने गरिन्छ।
मेलामा स्थानीय कला संस्कृति झल्कने झाँकीसमेत प्रदर्शनको व्यवस्था मिलाइएको साथै स्थानीय सामग्री डोको, नाङ्लो ठेका, डाला लगायतको व्यापारलाई स्टल निःशुल्क उपलब्ध गराइएको जनाएको छ।
