चैत ११ काठमाडौं ।
अन्नपूर्ण चक्रीय पदमार्गमा पर्यटकको चहलपहल बढ्न थालेको छ। दोस्रो मुख्य पर्यटकको याम सुरु भएसँगै अन्नपूर्ण क्षेत्रमा पदयात्री पर्यटकको संख्या बढ्न थालेको हो।
दोस्रो मुख्य पर्यटकीय याम चैत–वैैशाख सुरु भएसँगै अन्नपूर्ण चक्रीय पदमार्गमा पदयात्रीको चहलपहल बढ्न थालेको छ। अन्नपूर्ण क्षेत्रमा पदयात्राका लागि चैत–वैशाख र असोज–कात्तिक उत्तम मानिन्छ।
मौसम सफा भएर हिमाल खुले पछि पर्यटकको चहलपहल बढ्न थालेको साथै शरद क्रृतुपछि यो याममा धेरै पर्यटक नेपाल भित्रने ट्रेकिङ एसोसिएसन अफ नेपाल (टान) गण्डकीको अध्यक्ष कृष्णप्रसाद आचार्यले जनाएका छन्।
अन्नपूर्ण संरक्षण क्षेत्रमा अन्नपूर्ण आधार शिविर, मर्दी हिमाल, मनाङको तिलिचो ताल, घान्द्रुक, थोरङ्ला भञ्ज्याङ, उपल्लो मुस्ताङ, म्याग्दीको घोडेपानी, कोरी, मुक्तिनाथ, कास्कीको खुमै डाँडा आदि पदयात्री पर्यटकको रोजाइमा पर्ने गरेको छ।
अन्नपूर्ण चक्रीय पदमार्ग पदयात्राका लागि विश्वप्रसिद्ध गन्तव्यस्थल रहेको र पदयात्राका लागि विदेशी पर्यटकसँगै पछिल्लो समय आन्तरिक पर्यटकको पनि आकर्षण बढ्द थालेको (टान) का अध्यक्षले जनाएका छन्।
पोखरा जोड्ने मुख्य सडकमार्ग र अन्तरर्राष्ट्रिय हवाईयात्रालाई नियमित तथा व्यवस्थित बनाउन सके उल्लेख्य सङ्खयामा पर्यटक भित्र्याउन सकिने जनाएको छ।
प्राकृतिक सौन्दर्य, विशिष्ट भूगोल, हावापानी, जैविक विविधता, हिमाली जनजीवन, सभ्यता र संस्कृतिको अवलोकनसँगै घुमफिरको लागि पदयात्राका लागि पर्यटक जाने गर्दाछन्।
अन्नपूर्ण संरक्षण क्षेत्र आयोजना (एक्याप)का अनुसार अन्नपूर्ण क्षेत्रमा सन् २०२४ मा दुई लाख ४४ हजार ४५ जना विदेशी पर्यटक भित्रिएका थिए। ‘एक्याप’को अनुसार पदयात्रा र सडकमार्ग भएर सो क्षेत्रका विभिन्न गन्तव्यस्थलमा पुग्ने विदेशी पर्यटकको तथ्याङ्क राख्दै आएको छ।
सात हजार छ सय वर्ग किलोमिटरमा फैलिएको अन्नपूर्ण संरक्षण क्षेत्रमा कास्की, लमजुङ, मनाङ, म्याग्दी र मुस्ताङका १६ स्थानीय तहका ८९ वडा समेटिएका छन्।
