मंसिर २१ काठमाडौं ।
आज बिहान भुटानी राजा जिग्मे वाङचुक काठमाडौं आउने भएका छन्।
भारत भ्रमणमा रहेका भुटानी राजा जिग्मे वाङचुक शुक्रबार दिल्लीबाट काठमाडौं आउने भएका हुन्। काठमाडौं आएपछि राजा बौद्धनाथ र स्वयम्भूनाथको दर्शन गर्न कार्यक्रम रहेको जनाएको छ।
भुटानी राजा वाङचुक १९ सदस्यीय भ्रमण दलको नेतृत्व गर्दै काठमाडौं आउन लागेका हुन्। भुटानका राजा नेपाल आउने भएसँगै गृह मन्त्रालयले उनका लागि उच्च सुरक्षा व्यवस्था मिलाएको छ।
भ्रमण दलमा राजासहित ऊर्जामन्त्री, विदेशसचिव, नेपालका लागि भुटानी राजदूत, सुरक्षा अधिकारी लगायत सदस्य रहेका छन्। उनका सुरक्षाका लागि तीनवटै सुरक्षा निकाय खटिने छन्। भुटानी राजा दर्शनका लागि जाने बौद्धनाथ, स्वयम्भूनाथ र त्यस आसपासका क्षेत्रको सुरक्षा व्यवस्थामा कडाइ गरेको छ।
निजी भ्रमणको सिलसिलामा आज बिहान काठमाडौं आउन लागेका वाङचुक करिब पाँच घण्टा काठमाडौंमा रहेर फर्किने तालिका छ। उनको निजी भ्रमण भएकाले कसैसँग भेटघाटको कार्यक्रम तय नभएको परराष्ट्र मन्त्रालय स्रोतले जनाएको छ।