मंसिर १४ काठमाडौं।
विवेकशील साझा र रास्वपा बीच एकता भएको छ।
विवेकशील साझा पार्टी र राष्ट्रिय स्वतन्त्र पार्टी (रास्वपा) बीच ५ बुँदे सहमति पत्रमा हस्ताक्षर गर्दै पार्टी एकता भएको हो।
पार्टी एकताका लागि रास्वपाका तर्फबाट कार्यवाहक सभापति डोलप्रसाद अर्याल र उपसभापति स्वर्णिम वाग्ले तथा विवेकशील साझाकी अध्यक्ष समीक्षा बास्कोटा र उपाध्यक्ष प्रकाशचन्द्र परियार बीच सहमति पत्रमा हस्ताक्षर भएको छ।
आज दुई पार्टी बीच राष्ट्रिय सभा गृहमा कार्यक्रम गरेर पार्टी एकता पत्रमा हस्ताक्षर गर्दै पार्टी एक भएको घोषणा गरेका छन्।
पार्टी एकताको क्रममा दुवै पार्टीका सदस्य र सल्लाहकारलाई केन्द्रीय, प्रादेशिक र स्थानीय तहगत संरचनामा समुचित समायोजन गरी जिम्मेवारी तोक्दा योग्यता, समावेशिताको सिद्धान्त र सार्वजनिक छविलाई आधार मान्ने सहमति भएको जनाएको छ।
एकीकरण पश्चात् दलको नाम ’राष्ट्रिय स्वतन्त्र पार्टी’, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति र दलको चिन्ह ’घण्टी’ रहने सहमति गरेका छन्।
