साउन १९ काठमाडौं ।
रुसको कामचाट्का द्धीपमा क्रशोनिनिकोभ ज्वालामुखी विष्फोट भएको छ। अधिकारीहरुको अनुसार रूसमा ५०० वर्षपछि पहिलोपटक क्रशेनिनिकोभ ज्वालामुखी विष्फोट भएको जनाएका छन्।
बीबीसीको अनुसार चार दिन अघि ८.८ म्याग्निच्युडको भूकम्प गएको स्थान कामचाट्का द्वीपमै ज्वालामुखी पनि देखिएको जनाएको हो।
कामचाट्काको आपत्कालीन मामिला मन्त्रालयले क्रशेनिनिकोभ ज्वालामुखी ५०० वर्षपछि विष्फोट भएको औपचारिक जानकारी दिएको जनाएको छ।
कामचाट्काको ‘भल्केनिक इरिप्सन रेस्पोन्स टिम’की प्रमुख ओल्गा गिरिनाले चार दिनअघि रूसको कामचाट्का द्वीपमा गएको ८.८ रेक्टर स्केलको शक्तिशाली भूकम्पसँग सम्बन्धित ज्वालामुखी हुनसक्ने बताएको बीबीसीले जनाएको छ।
भूगर्भविदहरुका अनुसार ७५ प्रतिशत सक्रिय ज्वालामुखीहरू रिंग अफ फायर क्षेत्रमा छन्। यसैगरी विश्वका ९० प्रतिशत भूकम्पहरू रिंग अफ फायर क्षेत्रमै पर्दछन्। यो क्षेत्र करिब ४० हजार किलोमिटर लम्बाइमा फैलिएको जनाएको छ।
रिंग अफ फायर त्यो क्षेत्र हो जहाँ धेरै महाद्वीपीय र महासागरीय टेक्टोनिक प्लेटहरू छन्। तिनै प्लेटहरू एकापसमा ठोक्किँदा भूकम्प, सुनामी र ज्वालामुखी विस्फोट जस्ता घटना हुने भूगर्भविदहरुले बताएका छन्।
