चैत २२ काठमाडौं ।
दक्षिण कोरियाका राष्ट्रपति युन सुक योलको पद मुक्त भएको छ। कारियामा सैनिक कानुन घोषणा गरेका राष्ट्रपति योलमाथि लगाइएको महाभियोग प्रस्तावलाई आज संवैधानिक अदालतले सदर गरेको हो।
अन्तर्राष्ट्रिया समाचार संस्था रोयटर्सले जनाए अनुसार संवैधानिक अदालतले योलमाथिको महाभियोग सदर गरी उनलाई पदमुक्त गर्ने फैसला गरेको जनाएको छ। योल पदमुक्त भएसँगै दक्षिण कोरियामा अब ६० दिनभित्र आम निर्वाचन गर्नुपर्ने छ।
गत डिसेम्बर ३ मा राष्ट्रपति योलले देशमा सैनिक कानुन घोषणा गरेका थिए। तर उनको घोषणालाई दुई घन्टामै संसदले उल्ट्याइदिएको थियो। लोकतन्त्रमाथि प्रहार गरेको भन्दै संसदले राष्ट्रपति योलमाथि महाभियोग लगाएको थिए।
दक्षिण कोरियामा संसदले महाभियोग लगाएर मात्रै राष्ट्रपतिलाई हटाउन सक्दैन। संसदबाट लगाएको महाभियोगमा संवैधानिक अदालतले अन्तिम फैसला गर्नुपर्छ। आज संवैधानिक अदालतले योलमाथिको महाभियोग सदर गरेपछि उनी राष्ट्रपति बाट पदमुक्त भएका हुन्।
योलपछि दक्षिण कोरियाली संसदले कार्यवहाक राष्ट्रपति हान डक सूलाई पनि महाभियोग लगाएको थियो। हानले योलविरूद्धको महाभियोग प्रक्रिया अगाडि नबढाएको भन्दै संसदले महाभियोग लगाएर हटाएका थिए।
उनी माथिको महाभियोग संवैधानिक अदालतले अस्वीकृत गरिदिएपछि कार्यवहाक राष्ट्रपतिको जिम्मेवारी पुनर्बहाली भइसकेका छन्। अब उनैले आगामी ६० दिनभित्र दक्षिण कोरियामा चुनाव गराउनेछन्।
