चैत २० काठमाडौं ।
आज काठमाडौं वायु प्रदूषण उच्च तहमा पुगेको छ। पछिल्ला केहि दिन यता काठमाडौंमा वायु प्रदूषण उच्च भएको छ।
वातावरण विभागका अनुसार काठमाडौंको वायु प्रदूषण निकै अस्वस्थकरको तहमा पुगेको छ। आज भारतको दिल्ली पछि काठमाडौं दोस्रो प्रदूषित सहर बनेको छ। काठमाडौं सोमबार र मंगलबार लगातार संसारकै प्रदूषित सहर बनेको थियो। आज झन् वायु प्रदूषण बढेको छ।
आईक्यूएयरको तथ्यांक अनुसार आज काठमाडौंको औसत एयर क्वालिटी इन्डेक्स (एक्युआई) रौंभन्दा तीन गुणा मसिना धुलो धुवाँका कण प्रतिघण्टा २६८ माइक्रोग्राम प्रति घनमिटर मापन गरिएको छ।
पहिलो स्थानमा रहेको दिल्लीमा, तेस्रो स्थानमा इराकको बगदाद, चौथो नम्बरमा भियतनामको हानाइ, पाँचौ नम्बरमा पाकिस्तानको लाहोर, छैटौं नम्बरमा थाइल्याण्डको चियाङ मइ, सातौं नम्बरमा इजरायलको तेल अववि गाफो, आठौं नम्बरमा भारतको मुम्बइ, नवौं नम्बरमा चीनको वुहान र १० नम्बरमा म्यानमारको याङगुन रहेको छ।
पछिल्लो एक सातादेखि काठमाडौं लगायत देशका मुख्य सहरहरुमा हावा प्रदूषण बढेको छ। यसको मुख्य कारण उद्योग, कलकारखाना र सवारी साधनबाट निस्कने धुवाँ, डढेलो, खुला रुपमा फोहोर तथा कृषिजन्य अवशेष जलाउने, घरबाट निस्कने धुवाँ, सडक तथा निर्माण कार्यहरुबाट उड्ने धुलो आदि भएको वातावरण विभागले जनाएको छ।
