चैत १४ काठमाडौं ।
खानेपानी मन्त्री प्रदीप यादव र जापानी राजदूत माएदा तोरुबीच भेटवार्ता भएको छ।
भेटवार्ताको क्रममा मन्त्री यादवले नेपालको विकासका प्राथमिकताका क्षेत्रहरूमा जापानी लगानी भित्र्याउने सम्भावना रहेको बताउँदै जापानका लगानीकर्ताहरूलाई नेपालमा लगानी गर्न प्रेरित गर्न विशेष आग्रह गरेका छन्।
विदेशी लगानीकर्ताहरुको लगानी सुनिश्चित गर्न प्रतिबद्धता व्यक्त गर्दै मन्त्री यादवले जापानका लगानीकर्ताहरूलाई नेपालमा लगानी गर्नका लागि थप प्रोत्साहन गर्न आग्रह गरेका थिए।
सन् १९५६ मा स्थापना भएको कूटनीतिक सम्बन्ध झन बलियो र मैत्रीपूर्ण बन्दै गएको साथै नेपाल–जापान सम्बन्ध ऐतिहासिक रूपमा नै निकै प्रगाढ रहेको उल्लेख गरेका छन्।
यादवले ‘विभिन्न प्राकृतिक विपत्तिहरूमा जापानी जनता, सरकार, गैरसरकारी संस्था तथा विश्वविद्यालयहरू बाट प्राप्त सहयोगप्रति नेपाल सरकार तथा नेपाली जनता आभारी रहेको र नेपालले सदैव जापानसँगको आपसी हित, सहकार्यलाई उच्च महत्व दिँदै आएको बताएका छन्।’
सन् १९७६ देखि पाल्पाको तानसेन खानेपानी परियोजना, सन् १९९३ मा काठमाडौंको महाङ्कालचौरमा पानी प्रशोधन केन्द्र निर्माण तथा सन् २०१८ मा मेलम्ची खानेपानी आयोजना अन्तर्गत प्रशोधन केन्द्र निर्माणमा जापानी सरकारले विगतदेखि नै जापान सरकाले अनुदान परियोजनाहरुमा महत्वपूर्ण सहयोग गर्दै आएको उल्लेख गरेका छन्।
भेटका अवसरमा राजदूत माएदा तोरूले जापान सरकार नेपालमा विगतदेखि नै विभिन्न विकासका परियोजनाहरूमा संलग्न रहँदै आएको र आगामी दिनमा पनि नेपालको शिक्षा, स्वास्थ्य, खानेपानी लगायतका क्षेत्रमा निरन्तर सहयोग रहने प्रतिबद्धता व्यक्त गरेका छन्।
