चैत ७ काठमाडौं ।
धर्मको नाममा सिरहाको ओरही गाउँपालिका–५का दलित परिवारको घर भत्काइएको छ। पालिकाले चैत १७ गतेदेखि सुरू हुने महायज्ञका लागि दीपक मरिकको घर भत्काएर अन्यत्र सारेको जनाएको हो।
पूर्वपश्चिम हुलाकी राजमार्ग अन्तर्गत सिरहाको औरही गाउँपालिका–५ स्थित सडक किनारमा दिपक मरिक (डोम) बस्ने छाप्रो छ । धर्मकै नाममा गर्न थालिएको महायज्ञका कारण मरिकको परिवार विस्थापित गरिएको हो।
यो घटनाबारे बाहिर आएपछि सिरहाका प्रमुख जिल्ला अधिकारी बासुदेव दाहालले घटनाबारे मेरो पनि ध्यानाकर्षण भएको र बुझ्न जिल्ला प्रहरी कार्यालयलाई जानकारी गराएको बताएका छन्।
जिल्ला प्रहरी कार्यालय सिरहाका प्रमुख एवं एसपी रमेश पण्डितले घटनाबारे बुझ्ने काम भइरहेको बताएका छन्।
पिडित परिवार सँग भएको कुराकानीमा पालिकाले पटकपटक जग्गा छाड्न ताकेता गरेको साथै पत्र समेत भेटिएको जनाएको छ।
पालिकाले उक्त जग्गा खाली गर्न भनेर कात्तिक २७ गते ३५ दिने सूचना निकालेको थियो। त्यसपछि पुस ४ गते १५ दिने सूचना निकालेको थियो। पुस २२ गते ७ दिने र माघ २० गते तीन दिने सूचना जारी गरेको भेटिएको एसपीले बताएका छन्।
महायज्ञ आयोजना गर्ने स्थानमा अछुत डोम राख्न नहुने भनेर यज्ञका कर्ताधर्ता मानिएका महात्यागी बजरंगी बाबाको निर्देशनमा पालिका अध्यक्ष शिवजी यादवले पालिकाकै जेसीभी लगाएर गत फागुन १० गते मरिक परिवारको घर भत्काउन लगाएको थिए।
आयोजकले मरिकको घरमात्र भत्काएन, अछुतले छोएको ठाउँ भनेर घरले चर्चेको स्थानमा दुई फिट खनेर माटो फालिएको छ।
मरिकको परिवार त्यही महायज्ञस्थल नजिकै विगत २५ वर्षदेखि सानो छाप्रोमा परिवार सहित बस्दै आएको थियो। बसेको स्थानमा जनता आवास कार्यक्रम बाट ५ वर्ष अघि दुई कोठाको पक्की भवन पालिकाले नै बनाइदिएको थियो। घर भत्काएर नयाँ ठाउँमा सारिदिएपछि मरिक परिवार अहिले बिचल्लीमा परेको छ।
घर भत्काएर मरिक परिवारलाई हाल श्री सुन्दर जनता माध्यमिक विद्यालय, औरहीको करिब २ धुर जग्गामा दुई कोठाको टिनले छाएको घर बनाएर राखिएको छ। त्यही घरमा मरिक दम्पतीसहित उनका दुई छोरा, दुई छोरी, एक बुहारी बस्दै आएका छ।
मरिककी पत्नी अनिताले भनिन्, ‘घर पनि हाम्रै काठपात र थोत्रो जस्ता हालेर ठड्याइदिएका छन्।’ भने बिजुली, पानीको कुनै सुविधा नरहेको साथै पानी पनि एक महिनादेखि मागेर गुजारा गरिरहेको बताएको छिन्।
पुरानो बासस्थानबाट तिमीहरू हट्नु पर्छ भनेर गाउँपालिका अध्यक्ष शिवजी यादव र वडा नम्बर ५ का पूर्ववडाध्यक्ष दिलीप यादवले दबाब दिएको अनिता बताएको छिन्।
पालिका अध्यक्ष शिवजी यादवले मरिक परिवारको घर भत्काइदिएको स्वीकार गरेका छन्। ‘त्यहाँ कृषि बजार लगाउन ३ करोडमा टेन्डर सहित कम्पाउन्ड वाल लगाउन भत्काएको बताए पनि कृषि बजार बनाउने स्थानको उत्तरी भाग ऐलानी जमिनमै बसेका गैरदलितहरूको घर भने जस्ताको तस्तै छ भत्काएको छैन्।