फागुन २९ काठमाडौं ।
होलीको लागि भारत र चीनबाट १६ करोडको रङ आयात भएको छ। होली रङहरुको पर्व भएकाले विभिन्न थरीको रङ एक आपसमा लगाएर होली मनाईन्छ। यो पर्व पहाडी र तराई भेगमा मानिसहरु हर्षोल्लासका साथ मनाउने गर्छन्।
हरेका वर्ष मनाउने होली पर्वमा आयात हुने रङको सरकारी तथ्यांक अनुसार आर्थिक वर्ष २०८१, ८२ को सात महिना अवधिमा भारत र चीनबाट १५ करोड ८९ लाख ६० हजार रुपैयाँ बराबरको रङ नेपाल भित्रिएको छ।
होलीमा लाखौं किलो परिमाण बराबरको रङ प्रयोग हुने गरेको पाइन्छ। भन्सार विभागको पछिल्लो तथ्यांक हेर्दा गत सात महिनामा दक्षिणी छिमेकी भारत बाट सबैभन्दा धेरै रङ आयात भएको देखिन्छ।
भारतबाट उक्त अवधिमा १५ करोड ८८ लाख ३ हजार रुपैयाँ बराबरको १३ लाख ३८ हजार २ सय ९२ किलो रङ आयात भएको देखिन्छ । यसरी आयात भएको रङको अधिकांश परिमाण होलीमा खपत हुने गरेको छ। त्यसबाहेक दसैं, तिहार अन्य चाडपर्वमा पनि खपत हुने गरेको छ।
नेपालमा भारतपछि उत्तरी छिमेकी चीनबाट धेरै रङ आयात हुने गरेको भन्सार विभागको तथ्यांकमा देखिन्छ। चीनबाट पछिल्लो सात महिनामा १ लाख ५७ हजार रुपैयाँ बराबरको ७ सय ६१ किलो रङ आयात भएको जनाएको छ।
