फागुन २१ काठमाडौं ।
नेपाल पन्छीविद् संघका अनुसार झापाको मेचीनगरमा नयाँ प्रजातिको बैजनी बुंगेचरा भेटिएको छ। झापाको मेचीनगर नगरपालिका–६, काँकरभिट्टामा समुद्रसतहबाट १३३ मिटर उचाइमा पर्पल रम्प सनबर्ड फेला परेको हो।
मेचीनगर क्षेत्रको एक आवासीय भवन परिसरमा रहेको एभोकाडो तथा सितलचिनीको रुखमा पहिलो पटक उक्त चराको भालेपोथी देखेको थियो।
संघका अनुसार पहिलो पटक चराविद् देवेन्द्रकुमार खरेलले देखेको उक्त चरा त्यसपछि चराविद्हरू अनिश तिमसिना, चक्र तिमसिना र शंकर लुइँटेलले पनि अवलोकन गरेका थिए।
त्यसयता दुई दिनसम्म सोही ठाउँमा यो चराको अभिलेख भएको र सो चराको यकिन पुष्टिका लागि खरेलले नेपाल बर्ड रेकर्ड कमिटी (एनबीअरसी) मा विवरणसहित चराको तस्वीरहरू पठाएको थियो।
एनबीअरसीमा प्राप्त विवरणका आधारमा अध्ययन गर्दा उक्त चराको अंग्रेजी नाम पर्पल रम्प सनबर्ड र वैज्ञानिक नाम लेप्टोकोमा जेइलोनिका (Linnaeus, १७६६) भएको जनाएको छ।
संघका अनुसार यो चराको नेपाली नाम बैजनी बुंगेचरा राखिएको छ। यो चरा बंगलादेश, भारत, म्यानमार र श्रीलंकामा आवासीय रूपमा पाइने र सोही क्षेत्रमा प्रजनन गर्ने गरेको छ।
नेपालमा अभिलेख भएको यो चरा एलजेड जेइलोनिका उपप्रजातिको हो । योसँगै नेपालमा चरा प्रजातिको संख्या ८ सय ९८ पुगेको छ।
