फागुन २० काठमाडौं ।
चितवन राष्ट्रिय निकुञ्जले राप्ती नदीमा घडियाल गोही छाडेको छ। निकुञ्जले घडियाल गोही प्रजनन केन्द्रमा हुर्काइएका १०३ गोही राप्ती नदीमा छाडेको हो।
निकुञ्जको अनुसार साउनयता पटकपटक गरी गोही नदीमा छाडिएको छ। छाडिएकामध्ये एउटा भाले र अन्य पोथी गोही रहेका छन्।
नदी किनारबाट गोहीका अण्डा सङ्कलन गरेर प्रजनन् केन्द्रमा राखेर कोरलेको गोही हुर्किए पछि नदीमा छोड्ने गरिन्छ।
हालसम्म राप्ती, नारायणीसहित देशका विभिन्न नदीमा दुई हजार ६० गोही छाडिएको छ।
यद्यपि ती गोही बच्ने दररेट निकै न्यून रहेको छ। निकुञ्जको अनुसार गत वर्ष गरिएको सर्वेक्षणमा राप्तीमा १५२ र नारायणी ११३ गोही भेटिएका थिए। हाल प्रजनन केन्द्रमा ६९७ गोही रहेका छन्।
घडियाल गोही सङ्कटापन्न अवस्थामा पुगेको सरीसृप प्राणी हो। विगतमा पाकिस्तान, बङ्गलादेश, भूटान, म्यान्मार लगायत देशमा समेत पाइने गरेका घडियाल अहिले नेपाल र भारतमा मात्रै पाइन्छन्।
