पुस २८ काठमाडौँ ।
सरकारले २७ औं भूकम्प सुरक्षा दिवस माघ २ गते मनाउँने भएको छ।
सहरी विकास तथा भवन निर्माण विभागले पत्रकार सम्मेलन गर्दै ‘भूकम्पले सिकाएको पाठ, बलियो संरचना र सुदृढ पूर्वतयारीका साथ’ माघ २ गते २७ औँ भूकम्प सुरक्षा दिवस मनाउन लागेको जानकारी दिएका हो।
यस दिन कीर्तिपुर क्षेत्रमा विभिन्न संस्थाहरूले लामबद्ध भई भूकम्प सुरक्षा र्यालीलीमा भाग लिने जनाएको छन्। वि.सं. १९९० साल माघ २ गते २ बजेर २४ मिनेटमा गएको महाभूकम्पको स्मृतिमा नेपालमा सरकारले २०५५ सालदेखि हरेक वर्ष माघ २ गतेका दिनलाई भूकम्प सुरक्षा दिवस मनाउँदै आएको छ।
विभागको अनुसार यस दिवसको मूल समारोहको कार्यक्रम कीर्तिपुर नगरपालिकास्थित बिपी कोइराला मेमोरियल विज्ञान संग्रालय परिसरमा आयोजना गरिने जनाएको छ।
कीर्तिपुरको पाँगा दोबाटोबाट सुरु भएर उक्त र्याली पाँगा बसपार्क, लाछी भ्यावं, नगाउँ, खसी बजार, बाघ भैरव मन्दिर, इट्टाछे, मंगल स्कुल, नगरपालिका भवन हुँदै कार्यक्रम स्थल आइपुग्ने छ।
कार्यक्रम स्थलमा दुई दिने भूकम्प सुरक्षा प्रदर्शनी कार्यक्रमको आयोजना गरिने र सो कार्यक्रममा विपद् जोखिम न्यूनीकरणको क्षेत्रमा काम गर्ने विभिन्न संघसंस्थाहरुको पनि सहभागिता रहने विभागले जनाएको छ।
भूकम्प सुरक्षा दिवसको उपलक्ष्यमा प्रदेश, स्थानीय तह लगायत देशभरि नै गोष्ठी, छलफल, र्याली, अन्तक्र्रिया, प्रदर्शनी, प्रतियोगिता कार्यक्रम, रक्तदान, सडक नाटक, अडियो भिडियो कार्यक्रमहरू लगायतका विभिन्न प्रचारप्रसारका कार्यक्रमहरू आयोजना हुने पनि विभागले जनाएको छ।
