पुस २८ काठमाडौं ।
चितवनको सिमसार क्षेत्रमा ५५ प्रजातिका चरा भेटिएका छन्। पूर्वीचितवनको सिमसार क्षेत्रमा गरिएको चरा गणनामा यो वर्ष ५५ प्रजातिका चरा भेटिएका हुन्।
चितवन राष्ट्रिय निकुञ्ज, तालतलैया, नदीनाला आसपास फैलिएको क्षेत्रमा बर्ड एजुकेशन सोसाइटी र नेपाल पन्छीविद् सङ्घको आयोजनामा पुस २२ र २३ गते गणना गरिएको थियो।
बर्ड एजुकेशन सोसाइटीका कार्यक्रम संयोजक चराविज्ञ बासु बिडारीका अनुसार यसपालि कालो टाउके गङ्गाचिल र राजा गङ्गाचिल देखिएका हुन्। गत वर्ष नभेटिएको दुई प्रजातिको चरा यस पटक भेटिएको बताएका छन्।
यस वर्ष लोथरबाट दरै बोटेताल, गैडहवा (जिन्दगानी घाट)बाट सौराहाघाट, सौराहाघाटबाट कसरा पुल, तमोर ताल, लामी ताल, बीस हजार ताल र यससँग सम्बन्धित ताल भण्डारा माछापोखरी, बुढी राप्ती ढुङ्गरे खोला, पटना ताल लगायत पूर्वीचितवनको सिमसार क्षेत्रमा गणना गरिएको थियो।
दुई दिन भएको चरा गणनामा सात हजार एक सय ५० चरा समावेश भएको र गत वर्ष ५३ प्रजातिका चरा भेटिएकोमा यस पटक ५५ प्रजातिको चरा देखिएको बताएका छन्।
जलकौवा सानु ११७ र ठूलो ४६० वटा गणनामा समावेश भएका छन्। बर्ड एजुकेशन सोसाइटीका पूर्वअध्यक्षसमेत रहनुभएका बिडारीले प्रदूषण, नदीजन्य पदार्थ उत्खनन र बढ्दो मानवीय चहलपहलका कारण जलपन्छीको सङ्ख्या घट्दै गएको बताए।
नेपाल लगायत पूर्वी एसियाका ३५ देशमा प्रत्येक वर्ष अङ्ग्रेजी वर्षको जनवरीमा पानी चरा गणना गरिँदै आएको छ।
