मंसिर २० काठमाडौं।
वैकल्पिक पदमार्गमा पर्यटकको आकर्षण बढ्दै गएको छ।
विश्वको दश उत्कृष्ट पदमार्गको सूचिमा सूचिकृत अन्नपूर्ण चक्रीय पदमार्गमा सडक विस्तार भएपछि सञ्चालनमा आएको वैकल्पिक पदमार्गमा पर्यटकको आकर्षण बढ्दै गएको हो।
कास्की जिल्लाको नयाँ पुलबाट पर्वतको मोदी गाउँपालिका ताङ्ले–भमरकोट–डाँडाकमेरे–माटे–जलजला–मोहोरेडाँडा–घोडेपानी जोड्ने पदमार्ग सञ्चालनमा आएपछि पर्यटकको आगमन बढ्न थालेको हो।
विशेषगरी युरोपियन, कोरियन, अस्ट्रेलियन, जर्मन तथा रसियन पर्यटकहरूले यो रुट प्रयोग गर्न थालेका छन्। पर्यटकीयस्थल घोडेपानी जोड्ने नयाँ पदमार्ग तयार भएपछि पर्यटकको आगमन बढ्न थालेको स्थानीय पर्यटन व्यवसायीले बताएका छन्।
पर्वत–भमरकोट–घोडेपानी पर्यटन क्षेत्र विकास समितिका अध्यक्ष मनबहादुर खड्काका अनुसार आधारभूतस्तरको पूर्वाधार तयार भएपछि उक्त वैकल्पिक पदमार्ग यस वर्षदेखि सञ्चालनमा आएकोक जानकारी दिएका छन्।
संस्कृति र प्रकृतिले भरिपूर्ण यो पदमार्गमा हिमश्रृङ्खला, सुन्दर वनजङ्गल, हावापानी, सुर्योदय र सुर्यास्तको दृश्यावलोकन गर्नुका साथै तनाव व्यवस्थापनका लागि निकै आकर्षक मानिएको छ।
दुई रात तीन दिनमा यात्रा गर्न सकिने पदमार्गमा वनजङ्गलमा विभिन्न प्रजातिका जडीबुटी, वन पैदावर पाइनुका साथै मृग लगायत वन्यजन्तुको बसोबास छ। धवलागिरि र अन्नपूर्ण रेञ्जका हिमाल अवलोकन गर्दै यात्रा गर्न सकिन्छ।
